Plantun de Prouvènço

Pèr coumpara dos planto d'encò nostre

Plantago lagopus & Ononis spinosa subsp. antiquorum

Pèd-de-lèbre

Plantago lagopus

Plantaginaceae

Autre noum : Auriho-de-lèbre.

Noms en français : Pied-de-lièvre, Plantain pied de lièvre.

Descripcioun :
Lou pèd-de-lèbre es uno planto de l'an que trachis dins li pelouso seco e li relarg roucaious. Li fueio blanquinouso soun tóuti basalo, e sort dóu pèd de poulìdis espigueto peludo e argentado (bratèio e sepalo) de 1,5 à 3 cm, que i'an douna soun noum.

Usanço :
Tóuti li fueio de plantage soun bono à manja, lou tout èi que siegon pas trop duro. En Sicilo fan bouli li fueio de pèd-de-lèbre e li servon emé d'òli d'óulivo e de sau (F. Couplan, op.cit. p. 352). Avèn pas d'entresigne segur, mai se poudrié qu'aguèsse li mémi prouprieta medicalo bèn couneigudo de soun cousin, l'erbo-di-cinq costo.

Port : Erbo
Taio : 5 à 30 cm
Fueio : basalo
Tipe bioulougico : Teroufite
Cicle bioulougico : Planto de l'an

Gènre : Plantago
Famiho : Plantaginaceae

Ordre : Lamiales

Coulour de la flour : Blanco
Petalo : 4
Ø (o loungour) flour : 5 à 15 mm
Flourido : Printèms

Sòu : Ca
Autour basso e auto : Pancaro entresigna
Aparado : Noun
Abriéu à jun

Liò : Tepiero seco - Roucaio - Garrigo
Estànci : Termoumediterran à Mesoumediterran
Couroulougi : Estenoumediterrano
Ref. sc. : Plantago lagopus L., 1753

Estanco-biòu

Ononis spinosa subsp. antiquorum

Fabaceae Leguminosae

Àutri noum : Tanco-biòu, Restanco-biòu, Avagoun, Ajagoun, Lènte.

Noms en français : Bugrane épineuse, Bugrane des anciens.

Descripcioun :
Aquesto planto pulèu bèn couneigudo, trachis dins la garrigo, tepiero seco e ermas. Dins li champ, emé sa forto racino fasié tanca l'arraire adounc li biòu, d'ounte lou noum; la subsp. presentado eici, dóu miejour de Prouvènço, èi di proun espinouso.

Usanço :
L'estanco-biòu èi couneigu desempièi li gre (Galien) pèr faire parti li graviho dóu ren ; defèt, la racino èi proun diuretico (mai sènt proun marrit). La planto èi vertuouso tambèn contro lou ràumi de pèu (eczema) bonodi si prouprieta anti-enflamativo. Èi peréu anti-bateriano (gagarisme pèr lou mau de gorjo), lucho contro li champignoun e mai enca.